ಎಲ್ಲಿ ಹೋಗಲೆ ಹೇಗೆ ಕಾಣಲೆ

 ಎಲ್ಲಿ ಹೋಗಲೆ ಹೇಗೆ ಕಾಣಲೆ
ನನ್ನ ಗಿರಿಧರನ
ನನ್ನ ಬೀಡಿಗೆ ತಾನೆ ಬಂದು
ಕಾದು ನಿಂತವನ
ಹೇಗೆ ಕಾಣದೆ ಹೋದೆನೆ
ಹೇಗೆ ತರಲವನ

ಈಗ ದಿನವು ದಾರಿಬದಿಗೆ
ನಿಂತು ಕಾಯುವೇನೆ
ಮತ್ತೆ ಬಾರದೆ ಸ್ವಾಮಿ ಎಂದು
ನಲುಗಿ ನೋಯುವೇನೆ

ತಾನೆ ಒಪ್ಪಿ ಬಂದ ಘಳಿಗೆ
ಹೇಗೆ ತಪ್ಪಿದೇನೆ
ಯಾವ ಮಾಯೆಗೆ ಬಿದ್ದು ನಾನೆ
ನಿದ್ದೆ ಹೋದೇನೆ

ಬಾರೊ ನನ್ನ ಗಿರಿಧರ
ಬಾರೊ ಇನ್ನೊಮ್ಮೆ
ಬಂದರೀ ಸಲ ಪ್ರೇಮದಲ್ಲಿ
ಬಿಗಿವೆ ನಿನ್ನನ್ನೆ

- ಎನ್.ಎಸ್ ಲಕ್ಷ್ಮೀನಾರಾಯಣ ಭಟ್ಟ