ಯಾವ ಕಣ್ಣೂ ಹೀಗೆ ನೋಡಲಿಲ್ಲ

 ಯಾವ ಕಣ್ಣೂ ಹೀಗೆ ನೋಡಲಿಲ್ಲ
ಕುಡಿನೋಟದಲ್ಲೇ
ನಿನ್ನಂತೆ,ನಲ್ಲೆ
ಯಾವ ಹೆಣ್ಣೂ ನನ್ನ ಕಾಡಲಿಲ್ಲ

ಒಮ್ಮೆ ಮೋಹಕ ನೋಟ ಹಾಯಿಸಿ
ಇನ್ನೊಮ್ಮೆ ನೋಡದೆ ನೋಯಿಸಿ
ಕನಸಲ್ಲೂ ಬಿಡದೆ ಸತಾಯಿಸಿ
ಕಣ್ಣಾಮುಚ್ಚಾಲೆಯನಾಡಲಿಲ್ಲ

ಏನೇನೋ ಸನ್ನೆಯ ಮಾಡಿ
ಬಳಿ ಬಂದು, ದೂರಕ್ಕೆ ಓಡಿ
ತಬ್ಬಿಬ್ಬಿನಲಿ, ನನ್ನ ದೂಡಿ
ಕ್ಷಣಕೊಂದು ಅಸ್ತ್ರವ ಹೂಡಲಿಲ್ಲ

ಹೃದಯದ ತಂತಿಯ ಮಿಡಿದು
ಪ್ರೀತಿಯ ಶೃತಿಯನ್ನು ಹಿಡಿದು
ತನ್ನ ಗುಟ್ಟನು ತಾನೇ ಒಡೆದು
ಅನುರಾಗ ಗೀತೆಯ ಹಾಡಲಿಲ್ಲ.

- ಬಿ.ಆರ್.ಲಕ್ಷ್ಮಣ್ ರಾವ್