ಸೇದುತ್ತ ಕೆಮ್ಮಿ ಏದುತ್ತ ಬಡಬಡಿಸುತ್ತ

 ಸೇದುತ್ತ ಕೆಮ್ಮಿ ಏದುತ್ತ ಬಡಬಡಿಸುತ್ತ
ಹಹ್ಹಹ್ಹಾ ಹಿಹ್ಹಿಹ್ಹೀ ಮೌನವ ಗುಡಿಸುತ್ತ
ಕುರುಕುತ್ತ ಅಳ್ಳಳ್ಳಾಯಿ ಮೆಲ್ಲುತ್ತ ಕಳ್ಳೆಕಾಯಿ
ಎದ್ದು ಮೈಮುರಿಯುತ್ತ ಕದ್ದು
ಹೆಣ್ಣೆದೆಯ ಕಣ್ಣಿಂದ ಮೈಮರೆಯುತ್ತ
ತಲೆ ಕೆರೆಯುತ್ತ ನಗೆಬಲೆಯ ತೆರೆಯುತ್ತ
ಸ್ಲಮ್ಲುಗಳ ಉಸಿರುತ್ತ
ನೋಡುತ್ತ ಗದ್ದೆಗಳ ಹಸಿರತ್ತ

ಮಾಸಾಂತ್ಯದ ಸಂಸಾರಿಯ ಮುಖವ ಸಂಜೆಯ ಸೀಳುತ್ತ
ದುರಾಸೆಯಂತೆ ಬೆಳೆಬೆಳೆಬೆಳೆದಿರುವ
ಹಳಿಗಳ ಮೇಲೆ ಒದ್ದಾಡಿರುವ ರೈಲಿನ ಡಬ್ಬಿಯ -

ದೇಸಿನಾಟಕದ ಮಾಸಿದ ಸೀನರಿಯ ಜ್ನಾಪಿಸುವ
ಮಂಕು ಬೆಳಕಲ್ಲಿ ಕುಸುಮೇಲೋಗರವಾಗಿ
ಅನುಭವವ ಛಾಪಿಸುವ ನನ್ನ ಸಹಪ್ರಯಾಣಿಕರು.

-ಕೆ ಎಸ್ ನಿಸಾರ್ ಅಹಮದ್