ಮನಸಿನಾಳಕಿಳಿದು ನಿಂತ ಶಾಂತ ಮಧುರ ದನಿಗಳೇ

ಮನಸಿನಾಳಕಿಳಿದು ನಿಂತ ಶಾಂತ ಮಧುರ ದನಿಗಳೇ
ಕಾಲ ಜಲದ ತಳಕಿಳಿದು ಮಿನುಗುತಿರುವ ಮಣಿಗಳೇ
ಹೇಗೆ ಅಲ್ಲಿಗಿಳಿದಿರಿ ಯಾಕೆ ಅಲ್ಲೆ ಉಳಿದಿರಿ
ಎಂದೂ ಮರೆಯಲಾಗದಂತೆ ಹಾಗೆ ಹೇಗೆ ಇರುವಿರಿ

ಆದುದೆಲ್ಲ ಮುಗಿಯಿತೆಂಬ ಮಾತು ಬರಿ ಸುಳ್ಳು
ಈಗಿರುವುದೆ ನಿಜವೆನ್ನುವ ಮಾತು ಸಹ ಸುಳ್ಳು
ಭಾವವೊಂದೆ ಸತ್ಯ ಕಾಲ ಪರಿಮಿತ್ಯ
ನಿಜವಾದುದೆ ಎಲ್ಲ ಕಾಲವುಳಿಯುವಂತ ನಿತ್ಯ

ಸ್ನೇಹ ಪ್ರೀತಿ ಇದ್ದ ಜೀವ ಹೇಗೆ ಬದಿಗೆ ಸರಿವುದು
ದೇಹ ಮರೆಗೆ ಸರಿದರು ನೆನಪು ಹೇಗೆ ಅಳಿವುದು
ಎದುರಿಗಿರುವ ಏನೇನು ಕಸ ಮನಸಿಗೆ ಬಾರದು
ಆಗಿ ಹೋದ ರಸ ಘಳಿಗೆ ಸದಾ ಮನವನಾಳ್ವುದು
 

-ಎನ್.ಎಸ್ ಲಕ್ಷ್ಮೀನಾರಾಯಣ ಭಟ್ಟ