ಕರಿಯವ್ನ ಗುಡಿ ತಾವ ಅರಳ್ಯಾವ ಬಿಳಿ ಹೂವ

 ಕರಿಯವ್ನ ಗುಡಿ ತಾವ ಅರಳ್ಯಾವ ಬಿಳಿ ಹೂವ
ಸೀಮೆಯ ಜನ ಕುಣಿದು ನಕ್ಕಾಂಗ್ ಅದ
ತುಂಟ ಹುಡುಗ್ಯಾರಲ್ಲಿ ನೆವ ಹೇಳಿ ಬರುತಾರೆ
ಹರೆಯದ ಬಲೆಯಲ್ಲಿ ಸಿಕ್ಕಾಂಗ್ ಅದ

ಊರಿಂದ ನಾಕೆಜ್ಜೆ ಹಾಕಿದರೆ ಕಾಣ್ತೈತೆ
ಚಂದಾಗೆ ಹರಿತವಳೆ ಐರಾವತಿ
ಮಳೆಗಾಲ ಬಂದಾಗ ಮೈಮರೆತು ಹರಿದವಳು
ಬ್ಯಾಸ್ಗ್ಯಾಗೆ ಬಸವಳಿದ ಐರಾವತಿ

ಕರಿಯವ್ನ ಗುಡಿ ತಾವ ಪಣ ತೊಟ್ಟು ಗೆದ್ದವರು
ಇನ್ನು ಬದುಕೆ ಅವರೆ ಸರದಾರರು
ಸಡ್ಡೊಡೆದು ಬಡಿದಾಡಿ ಉಯ್ಯಾಲೆ ತುಯ್ದಾಡಿ
ಮನಸಾರೆ ಮೆಚ್ಚಿಸಿದ ಸರದಾರರು

ಅಲ್ಲೊಂದು ಗಿಣಿ ಕೂತು ಕತೆಯೊಂದ ಹೇಳೈತೆ
ಕೇಳಾಕೆ ನಾನಿಲ್ಲ ಊರೊಳಗೆ
ಕತೆ ನಡೆದ ದಿನದಿಂದ ಕೆಂಪಾಗಿ ಹರಿದವಳೆ
ಕತೆಗಳ ಮಾರಾಣಿ ಐರಾವತಿ

-ಪಿ. ಲಂಕೇಶ್