ಕೋಟಿ ಕೋಟಿ ಜನುಮ ( ಕವಚ ಚಲನಚಿತ್ರ )

 

ಕೋಟಿ ಕೋಟಿ ಜನುಮ ಕಳೆದರೂ
ಅಪ್ಪ ತಾನೇ ಮೊದಲ ದೇವರು
ಮನಸಿನ ಗರ್ಭದ ಗುಡಿಯಲಿ ಹೆತ್ತವ
ಅಪ್ಪ ನನ್ನ ಅಪ್ಪ

ಅಪ್ಪ ಎಂದರೆ ಅನುರಾಗ
ಅಪ್ಪಿಕೊಳ್ಳುವ ಅಳುವಾಗ
ತ್ಯಾಗ ಪ್ರೀತಿಯ ಸಂಯೋಗ
ಗಮನಿಸಬಹುದು ನಗುವಾಗ

ಮಕ್ಕಳಲ್ಲೇ ತನ್ನ ಹೆತ್ತವರ
ಕಾಣೋ ಮಮತಾಮಯಿ
ತಪ್ಪು ಒಪ್ಪುಗಳ ಮನ್ನಿಸಿ
ಮುದ್ದಿಸೊ ಕರುಣಾಮಯಿ

ಕಷ್ಟಗಳ ದಾರಿಯಲ್ಲಿ
ಕನಸನು ಬಿತ್ತುತಾ
ಕಣ್ಣೀರಿಗೆ ನಗುವಿನ
ಬಣ್ಣ ಹಚ್ಚುತ
ಬಾಳ ದೂಡುತ

ಬೆವರಿಂದ ಭೂಮಿಯನು ತೊಳೆಯುತಿಹ

ಅಪ್ಪನು ಆತ್ಮದ ಅಧಿಕಾರಿ
ಉಸಿರನು ಹಂಚುವ ಉಪಕಾರಿ
ಶಿಕ್ಷಕ ರಕ್ಷಕ ಸಹಚಾರಿ
ಎಲ್ಲವೂ ಆಗುವ ಔದಾರಿ

ಕೋಟಿ ಕೋಟಿ ಜನುಮ ಕಳೆದರೂ
ಅಪ್ಪ ತಾನೇ ಮೊದಲ ದೇವರು

ಹೊತ್ತು ಗೊತ್ತುಗಳ ಲೆಕ್ಕ
ಮಾಡದಂತೆ ದುಡಿಯೋನವ
ಎಲ್ಲವನ್ನೂ ಕೊಟ್ಟು ಹೊತ್ತು
ಮೆರೆಸುವ ಅವನೇ ಶಿವ

ಉಟ್ಟ ಬಟ್ಟೆ ಹರಿದರೂ
ಚಿಂತೆ ಇಲ್ಲ ಅವನಿಗೆ
ಮಕ್ಕಳನ್ನು ರೇಶಿಮೆಲೆ
ಸಿಂಗರಿಸುವ ತಾಯತನದೆ

ಅವನೊಳಗೆ ಜಗ ತಣಿಸೋ ಲಾಲಿ ಇದೆ

ಮಕ್ಕಳ ಕೀರ್ತಿಗೆ ಹೆಮ್ಮೆ ಪಡೋ
ಮೊದಲನೇ ಜೀವವೇ ಅಪ್ಪ ಕಣೋ
ಮಕ್ಕಳ ನಾಳೆಗಳ ಬೆಳಗೋಕೆ
ಜೀವನ ಮುಡಿಪಿಟ್ಟ ದೈವ ಕಣೋ

ಕೋಟಿ ಕೋಟಿ ಜನುಮ ಕಳೆದರೂ
ಅಪ್ಪ ತಾನೇ ಮೊದಲ ದೇವರು
ತೀರದ ಋಣಗಳು ಮರೆಯದ ಕ್ಷಣಗಳು
ಅಪ್ಪ ನನ್ನ ಅಪ್ಪ

ಸೂರ್ಯ ಚಂದ್ರರು ಇರೊವರೆಗು
ಉಳಿಯಲಿ ಅಪ್ಪನ ಮುಗುಳು ನಗು
ಗುಡಿಸಲೇ ಇರಲಿ ಮಹಲಿರಲಿ
ಅವನ ಎದುರಲಿ ನಾನು ಮಗು

 Watch YouTube video