ಬಿರಿದ ಹೂವ ಮೆಲೆ ಗಾಳಿ

 ಬಿರಿದ ಹೂವ ಮೆಲೆ ಗಾಳಿ
ಸುಳಿದು ಬರುವ ಸಮಯದಲ್ಲಿ
ತೆರೆಯ ಹಿಂದೆ ತೆರೆಗಳೋಡಿ
ಕೆರೆಯ ಕವಿತೆಯಾಗುವಲ್ಲಿ
ನಿನ್ನ ನೆನವೆ, ನಿನ್ನ ನೆನೆವೆ
ನ್ನೊಲವಿನ ಸ್ಪೂರ್ತಿಯೆ !

ದೂರ ದೂರ ತಾರೆ ತಾರೆ
ಕಣ್ಣ ಮುಚ್ಚಿ ತೆರೆಯುತಿರಲು,
ನೀನಿಯೊಳಗೆ ನಿನ್ನ ದನಿಯೆ
ನನ್ನ ದನಿಯ ಕೊಡುವಲ್ಲಿ
ನಿನ್ನ ನೆನವೆ, ನಿನ್ನ ನೆನೆವೆ
ನನ್ನೊಲವಿನ ಮೂರ್ತಿಯೆ !

ಹಸಿರು ನಲಿವ ತಾಣದಲ್ಲಿ
ಬಿಸಿಲು ಮಿಡಿದ ಪ್ರಾಣದಲ್ಲಿ
ಜೋಡಿ ಹಕ್ಕಿ ಹಾಡುವಲ್ಲಿ
ಮುಂದೆ ದಾರಿ ಕಾಣದಲ್ಲಿ
ನಿನ್ನ ನೆನೆವೆ, ನಿನ್ನ ನೆನೆವೆ
ನನ್ನೊಲವಿನ ಕೀರ್ತಿಯೆ !

-ಕೆ ಎಸ್ ನರಸಿಂಹಸ್ವಾಮಿಯವರು