ಯಾವ ಕಾಲದಲಿ ಯಾರು ನಕ್ಕರೋ

 ಯಾವ ಕಾಲದಲಿ ಯಾರು ನಕ್ಕರೋ
ನೀನು ನಕ್ಕ ಹಾಗೆ ?
ಎಷ್ಟು ನೋವುಗಳ ನುಂಗಿಕೊಂಡರೋ
ನಕ್ಕ ಒಂದು ಗಳಿಗೆ !

ಬೇಡವೆಂದರೂ ಏಕೆ ನಗುವೆಯೋ
ತಿಳಿಯಲಿಲ್ಲ ನನಗೆ.
ಬಾಳಹಾದಿಯಲಿ ಹೇಗೆ ಚಿಗುರಿತೋ
ನೋವು ನಲಿವಿನೊಡನೆ ?

ಜ್ವಾಲೆಯಂತೆ ನಗೆ ಹೇಗೆ ಹಬ್ಬಿತೋ
ತುಟಿಯ ತಳಿರ ಬಳಿಗೆ ?
ನೋವ ನೆನಪು ಬಂದೇಕೆ ಕಾಡಿತೋ
ನಮ್ಮ ನಲಿವಿನೊಡನೆ !

ಕಣ್ಣ ನೀರಿನಲಿ ಹೊಳೆವ ನೋವಿನಲಿ
ನಗಲೆ ನಿನ್ನ ಜತೆಗೆ ?-
ಕೆಂಡದಂಥ ತಳಿರೇಕೆ ಬಳ್ಳಿಯಲಿ
ಕಾಣಲಿಲ್ಲ ನನಗೆ ?

ನಿಜದ ಅನುಭವಕೆ ಕನಸಿನಂಗಿಯನು
ತೊಡಿಸ ಬಂದೆ ನೀನು !
ಬಳಿಗೆ ಬಂದವಳು, ದೂರ ಸರಿದವಳು
ನಗುವೆಯಲ್ಲೆ ನೀನು ?

-ಕೆ ಎಸ್ ನರಸಿಂಹಸ್ವಾಮಿಯವರು.