ಕಣ್ಣ ಸನ್ನೆಯಿದೇನು ?

 ಕಣ್ಣ ಸನ್ನೆಯಿದೇನು ? ಕೆನ್ನೆಯಲಿ ಸುಳಿಬಂದು
ತುಟಿಯಂಚಿನಲಿ ಮಾತು ಮಾಯವಾಗಿರಲು
ಮತ್ತೊಮ್ಮೆ ಬೆಡಗಿನಲಿ ಜಡೆಯನೆದುರಿಗೆ ತಂದು
ಅದರ ಮೇಲೊಂದು ಸಲ ನಡುಬೆರಳನಿಳಿಸಿ
ಕಡೆಗೆ ಏನೋ ಏಕೋ ಜಗದಗಲ ಕಣ್ ತೆರೆದು
ನಿರಿಯ ಜರಿಯಂಚಿನಲಿ ಚೆಂದುಟಿಯನೊರಸಿ
ಮುನ್ನೀರು ತನ್ನ ಹನಿಯೊಂದರಲಿ ಮೈಹುದುಗಿ
ಮಿಂಚುವೊಲು, ಮೋಹನಾಂಗಿಯೆ, ಉಸಿರ ಬಲೆ ಬೀಸಿ
ನಿಲ್ಲಿಸದಿರೆನ್ನ ಪಯಣವನು. ನಾನಿಲ್ಲಿನ್ನು
ನಿಲ್ಲಲಾರೆನು ; ನನ್ನ ಬೀಳ್ಕೊಡುವುದುದೇ ಚೆನ್ನು.
ಹಬ್ಬಸಾಲಿಗೆ ಬಂದು ಹತ್ತುದಿನ ಇಲ್ಲಿದ್ದೆನಲ್ಲ !
ಗದ್ದಲದ ನಡುವೆ ಪ್ರೇಮದ, ತೆರೆಗೆ ತೆತ್ತೆವಲ್ಲ !
ಎಷ್ಟು ದಿನವಿದ್ದರೂ ಅಗಲಿಕೆಯು ತಪ್ಪದಲ್ಲ !
ಮತ್ತೆ ನಾನಿಲ್ಲಿ ಬಹ ದಿನವೇನು ಬಲುದೂರವಲ್ಲ !

-ಕೆ ಎಸ್ ನರಸಿಂಹ ಸ್ವಾಮಿಯವರು.